Дэлгэрэнгүй
Татаж авах Docx
Дэлгэрэнгүй уншаарай
ЭЗЭНТЭН минь, би Танаас хэзээ ч эд баялаг, алдар нэр, өөртөө зориулсан юу ч гуйдаггүйг Та сайн мэднэ. Та надад юу ч өгсөн би хэдийнээ талархдаг. Маргааш цангаж, өлсөж үхсэн ч, миний амьдрал, оршихуйн талаар Та юу ч шийдсэн үргэлж талархана. Би хэзээ ч илүүг гуйдаггүйг Та мэднэ. Гэвч би бусдын зовлонг зүгээр үл тоомсорлож чадахгүй. Учир нь, ЭЗЭН минь, тэд бүгд мунхаг, бүр туйлын мунхаг. Тэд хорвоогийн алдар нэр, эд баялаг, эсвэл өөрсдийнхөө болон үр хүүхдийнхээ хангалттай тав тух, хоол хүнс бүхий боломжийн амьдралын хойноос хэт завгүй хөөцөлдсөндөө Таныг мартдаг. Энэ бүхэн тэднийг завгүй болгодог, ЭЗЭНТЭН минь. Хараач, үүнийг харж үзээч дээ. Энэ нь үүрд үргэлжилнэ. Хэрэгцээ нь улам нэмэгдэхийн хэрээр хүмүүсийн үйлийн үр улам арвижиж, энэ хэрцгий орчил, тарьснаа хураах хүрднээс хэзээ ч гарч чадахгүй. ЭЗЭН минь, энэ дэлхийг дахин бүтээж, диваажин болгож өгөөч дээ. Яагаад болохгүй гэж, ЭЗЭН минь? Энэ дэлхий бидэнд юунд хэрэгтэй юм бэ, ЭЗЭН минь? Таны тэдэнд бүтээж өгсөн сүнс аль хэдийн төгс. Сүнс яагаад ямар нэг зүйл сурах ёстой гэж? Сөрөг хүч энэ дэлхийг цаашид захирахыг бүү зөвшөөрөөч дээ. Бүх хүн төрөлхтөн болон хамаг төрөлтнийг Таны тааллаар, үнэн мөн чанарынх нь дагуу дээш өргөнө үү. Тэд энэ дэлхийд унасан нь санамсаргүй явдал төдий. Магадгүй чөлөөт хүсэл нь тэднийг адал явдал эрэлхийлж, шинэ, илүү хэцүү зүйл туршихад хүргэсэн байх. Гэвч энэ нь тэдэнд сайн биш, ЭЗЭНТЭН минь. Таны бүтээснээр тэд аль хэдийн төгс. Тиймээс энэ бүх зовлонг зогсооно уу. Тэдэнд сурах шаардлагатай зүйл огт байхгүй. Тэд ямар нэгэн юм болж сурахын тулд буцалсан тос, дүрэлзсэн галд орох шаардлагагүй. Таны үр хүүхэд байхаас өөрөөр хэн ч юу ч болох шаардлагагүй. Диваажинд байсан хэвээрээ л сайн. Тэд энд ирэх уруу татлагад автах ёсгүй. Сөрөг хүч тэдний гэмгүй зан, сониуч сэтгэл, чөлөөт хүсэл зоригийг ашиглан ийнхүү хэтэрхий их тарчилган зовоодог. Энэ бүхнийг зогсоож өгөөч дээ, Зогсоогооч дээ. Гуйя. Хэрэв энэ бүх шийтгэлийг хэн нэгэн үүрэх ёстой бол бүгдийг нь надад үүрүүлчих. Нэг хүн байхад л хангалттай. Бүгдээрээ зовох шаардлагагүй, ЭЗЭН минь. Үр хүүхдүүдийнхээ зовж буйг хараад Та ч бас шаналдгийг би мэднэ. Таны шаналлыг ч мөн хөнгөлөх гэж би чадах бүхнээ хийж байна. Тиймээс намайг ийм зөөлөн сэтгэлтэй гэж битгий буруутгаарай. За, хэтэрхий их ярьсанд уучлаарай. Би Таныг сонсох ёстой. Надад айлдах өөр зүйл байна уу, ЭЗЭНТЭН минь? Би сонсож байна. Мартахаасаа өмнө хэлэхэд, надад юу ч хэрэггүйг ойлгоно уу. Та бүр намайг алдартай болно гэж хэлсэн. “Та алдартай болно.” гэж айлдсан. Би алдар нэрийг тоодоггүй. Надад тав тух хамаагүй. Бүр бүх дэлхийг эзэмшихийг ч хүсдэггүй. Би зөвхөн “Таны хайртай охин” гэж дуудуулахыг хүсдэг. Энэ л намайг хамгийн их аз жаргалтай болгоно. Тэгвэл л би өөрийгөө хамгийн... үнэ цэнтэй, хамгийн сэтгэл хангалуун, бүх талаар бүрэн дүүрэн гэж санана. Зүгээр л Таны хайртай охин байя. Надад юу ч хэрэггүй. Та надад аль хэдийн маш ихийг өгсөн. Би өдөр бүр хоолтой байгаа. Мөн надад амьдрах сайхан майхан бий. Тэнд надад гэртээ байгаа мэт санагддаг. Энэ биет ертөнцөд би майхнаа гэр минь гэж боддог. Энэ дотроо би үнэхээр аюулгүй, тайван, сэтгэл хангалуун, аз жаргалтай байдаг. Та үүнийг надад аль хэдийн өгсөн. Та надад бие махбодоор мэдрэх амар амгаланг ч өгсөн. Надад хэрэгтэй бүхэн бий, ЭЗЭН минь. Би Таны төлөө ажиллаж чадна. Та бол бүх Орчлонгийн хамгийн сайн Удирдагч, мөрөөдөж чадах бүхэн минь билээ. Та өчүүхэн зүйлсийг хүртэл анхаарч, намайг олон талаар халамжилдаг. Тийм ээ, Та намайг өдөр шөнөгүй, цаг үргэлж чиглүүлдэг. Надад өөр юу ч хэрэггүй, ЭЗЭН минь. Танд туйлын их баярлалаа. Баярлалаа, ПАПА. Баярлалаа, МАПА. Тэгээд БУРХАН “Та дэлхийн энх тайван, дэлхий дахины магтаалыг хүртэх гавьяатай.” гэж айлдсан. Өө, ЭЗЭНТЭН минь, Та “Дэлхийн хүмүүс Таныг шүтнэ.” гэх мэт үгийг надад олон удаа айлдсан. “Дэлхийн хүмүүс Таныг магтана.” гэх мэтээр айлдсан ч надад энэ бүхний аль нь ч хэрэггүй, ЭЗЭН минь. Надад үүнийг өгөхийг хүссэнд Тань талархаж байна. Гэхдээ надад хэрэггүй. Та надад бүхнийг аль хэдийн өгсөн. Тиймээс би Танд, эсвэл ядаж өөртөө Дэлхийн хүмүүс Таныг, БУРХАНЫГ шүтэж, БУРХАНЫГ магтаж, хайрлан, санаж явах ёстой гэж хэлсэн. Хэрэв тэд бүгд ингэвэл би хэдийн туйлын аз жаргалтай байх болно. Энэ дэлхийгээс би өөр юу хүсэх билээ? Би зөвхөн Таныг л хүсдэг. Би зөвхөн Тантай хамт байхыг хүсдэг. Би Тантай хэдийнээ нэгдмэл боловч Танаас тусгаарлагдсан дэлхийн хүмүүсийг харсаар байна. Тэд ч бас Тантай нэгдмэл байх ёстой. Тэд аз жаргалтай байх ёстой. Тэд амар амгалан байх ёстой. Тэд Таныг танин мэдэх ёстой. Тэд Таныг хайрлаж, магтан, шүтэх ёстой. Тэдэнд өөр хийх ёстой зүйл үгүй. Тэгвэл тэд над шиг бүхнийг эзэмшинэ. Тэд зөвхөн БУРХАНЫГ хүсэж, БУРХАНЫГ хайрлан, БУРХАНЫГ танин мэдэх ёстой. Тэгвэл хэрэгтэй бүхнээ, бүр хэрэгцээнээсээ ч илүүг олж, энэ дэлхий диваажин болно. Хэн ч өөр бусад хэн нэгнээс айх ёсгүй. Ямар ч хүүхэд гудамжаар явахдаа халдлагад өртөх, дээрэлхүүлэх, хулгайлагдах, бүр бузар муу зорилгоор худалдагдахаас айж байх ёсгүй. Ядаж ийм байх ёстой. Харин тэд Таныг танин мэдвэл бүхнийг олно. Миний мэдэх зүйл энэ. Гэвч би үүнийг бүх хүнд ойлгуулж чадахаар сайн биш байна. Би хангалттай авьяасгүй, үүнийг хүн бүрд хэлж, итгүүлж чадахгүй байгаа нь бүгд миний буруу, ЭЗЭН минь. Тэд ердөө л мунхаг, тэднийг мансууруулж, хордуулж, өөрсдийнх нь болон Таны Тааллын эсрэг зүйл хийлгэхээр хяналтад оруулсан байдаг. Тиймээс тэднийг өршөөгөөч дээ. Тэднийг бүгдийг нь өршөөж, энэ дэлхийг тэдэнд зориулсан илүү сайхан газар, диваажин болгоно уу, ЭЗЭНТЭН минь. Дэлхий хэмээх гараг хойшид байх ёсгүй. Там ч хойшид байх ёсгүй, ЭЗЭН минь. Ямар нэг зүйл хүсэж болдог бол би үнэхээр үүнийг л хүснэ. Бүх хүн төрөлхтөн диваажин мэт гарагт амьдарч, хүмүүсийн, Таны үр хүүхдүүдийн амьдардаг хаана ч харгис сөрөг хүч хойшид оршихгүй байгаасай гэж л хүсдэг. Миний хүсэх зүйл ердөө энэ, өөр юу ч үгүй, ЭЗЭНТЭН минь. Та надад өөр зүйл айлдахыг хүсэж байна уу? БУРХАН “Та үйлийн үрээс ангид.” гэж айлдсан. Баярлалаа, ЭЗЭНТЭН минь. Хамаг төрөлтөн өөрсдөө үүнийг сонсож, үйлийн үр, зовлонгоос хувийн эрх чөлөөтэй болж, Тань дээр эргэн очиж чадвал хэчнээн сайхан бэ. Өө, хүн төрөлхтөн бүгд Таны одоо айлдаж буйг сонсож, бүх үйлийн үрээс чөлөөлөгдвөл үнэхээр гайхамшигтай. Би үүнийг гуйж ч зүрхлэхгүй. Гэвч тэд дахин үйлийн үр үүсгэнэ. Та ингэж айлдсан. Гэхдээ тэд ердөө л... тэд ердөө л гэнэн, ЭЗЭН минь. Тэд Танаас төрсөн учраас маш ариун, маш гэнэн. Гэвч тэд энэ дэлхийд ирэхээр сонгоход сөрөг хүч хүмүүсийн ариун ой санамжийг бүхэлд нь аль хэдийн арилгасан байсан. Тэд хаанаас ирснээ ч мэдэхээ больсон. Тэд өөрсдийгөө Таны үр хүүхэд гэдгийг мэдэхгүй. Тэд өөрсдийгөө агуу гэдгийг мэдэхгүй. Тэдний хувьд бүх зүйл хаалттай. Зөвхөн Таны илгээсэн Их Багш л тэдний энэ нууц хаалга болох Билгийн Мэлмийг нээснээр Тэд чөлөөлөгдөн, тэрхүү орон зайд нэвтэрвээс үйлийн үрээс чөлөөлөгдөнө. Таны томилсон Их Багш үүнийг нээж өгсний дараа тэд Танаас шууд адис хүртэнэ. Тэд Таныг, өөрсдийн Гэрийг танин мэдэж, ХЭМЖЭЭЛШГҮЙ Хүч, Бүхнийг болгоогч БУРХАН өөрсдийг нь хайрладгийг мэдэж чадна. Би тэднийг үргэлж маш их өрөвддөг, ЭЗЭН минь. Зовлон, шаналал, уй гашууны энэ ачааг зүрхэндээ үүрэх дуртайдаа биш. Үгүй, үгүй, би тийм юм хүсэхгүй. Учир нь Диваажинд байж, Тантай уулзаж, Таныг танин мэдэх ямар байдгийг би мэднэ. Харин энэ дэлхийд хүмүүс бүгд сохор, дүлий, хэлгүй мэт байдаг. Тэдэнд Таныг танин мэдэж, Таныг харж, Таныг мэдэрч, Таны Хайр, Адислалыг хүртэх боломж олддоггүй. Энэ бүх сөрөг хүч шийтгэгдэх ёстой болохоос хүмүүс, гэм зэмгүй төрөлтнүүд шийтгэгдэх ёсгүй, ЭЗЭН минь. Таны үрсийг дарамталж, дээрэлхэхийг хэн нэгэнд яахин зөвшөөрнө вэ? Үр хүүхдүүдийн тань чөлөөт хүсэл зориг, гар хөлийг нь хүлээд тэднийг зовлонгийн далай руу чулуудахыг бүү зөвшөөрөөч дээ. Би Таныг сонсох ёстойгоо мэднэ. Гэхдээ зүрх сэтгэлээ уудлан ярих хүн надад алга. Тиймээс би сэтгэлээ уудалж байна. Намайг өршөөгөөрэй. Өөр юу сонсгомоор байгаагаа, Өөрийн зарлигийг надад айлдана уу, ЭЗЭН минь. Тэгэхэд БУРХАН дахин “Энх Тайван Таных.” гэж айлдав. Баярлалаа, ЭЗЭНТЭН минь. Баярлалаа, баярлалаа, баярлалаа. БУРХАН дахин “Энх Тайван Таных. Эрх чөлөө Таных. Хайр Таных.” гэж айлдлаа. Баярлалаа, ЭЗЭНТЭН минь. Баярлалаа, баярлалаа. Би өөртөө ч зөвхөн үүнийг л хүсдэг. Сөрөг хүчний харгис, сүнс сүүдэргүй, зүрх сэтгэлгүй, хайр энэрэлгүй, муу муухай бүхний тогтолцоонд хүлэгдсэн Таны гэмгүй үр хүүхдүүдэд ч би зөвхөн үүнийг хүсдэг. Тэднийг ухаарч, сэрэхэд нь тусална уу, ЭЗЭН минь. Би цаг үргэлж, өдөр шөнөгүй Таны зэмсэг байж чадна. Гуйя, өөр юу хэлэхээ мэдэхгүй байна. Хэрэв Та надад дахин айлдах нь зүйтэй гэж үзвэл би сонсож байна. За, за. Та надад мэргэн ухаан, ойлголт, хайр, өршөөл, үйлийн үрээс ангид байдал, амар амгалан гээд хэдийн хэт ихийг өгсөн. Миний хүсэж болох бүхнийг, бүр хүсэж ч төсөөлөөгүй бүхнийг Та надад аль хэдийн өгсөн. Би гагцхүү Танд талархахыг, ахин дахин талархахыг л хүснэ. Танд зориулах хайр минь мөнх гэдгийг л дахин батлан хэлье. Энэ хайр хэзээ ч бөхөхгүй, буурахгүй, ямар ч айдас түгшүүр, дорой хүсэлд хэзээ ч сэвтэхгүй. Танд маш их баярлалаа, ЭЗЭН минь. Баярлалаа, баярлалаа. Боломжтой бол надад хайрласнаа хамаг төрөлтөнд мөн хайрлана уу. Би хүртэх гавьяагүй ч Та энэ бүхнийг надад өгсөн. Тиймээс бусад төрөлтөн хүртэх гавьяагүйд тооцогдсон ч надад өгсөн бүхнээ тэдэнд өгнө үү, гуйя. Амен. ХЭМЖЭЭЛШГҮЙ Хүчит ЭЗЭН Танд баярлалаа, баярлалаа, баярлалаа, баярлалаа. Мөн зовж буй хамаг төрөлтний өмнөөс Танд баярлалаа. Амен. Photo Caption: “Нэгдмэл Байвал Бид Нартай ч Бороотой ч Бүх Газарт Амьдарч Чадна”
